GEÐVEIKUR FÓTBOLTI
Þar sem geðheilsa, hreyfing og gleði fara saman. Við nýtum kraft fótboltans til að efla andlega og líkamlega heilsu og draga úr fordómum.
Vetraræfingarnar eru hafnar og maraþonið gekk vel
FC Sækó var góðgerðarfélag í Reykjavíkurmaraþoni Íslandsbanka 22. ágúst og alls söfnuðust 153.500 kr. í áheitum. Kærar þakkir til allra sem studdu okkur, og til hlauparanna þriggja sem báru merki félagsins: Bergþór hljóp heilt maraþon, Jón Grétar 10 km og Orri skemmtiskokkið.
Hver króna fer beint í að niðurgreiða æfingarnar. Við leigjum aðstöðuna í Kórnum og Breiðholtsskóla og það er þessi stuðningur sem heldur æfingunum opnum og ókeypis fyrir alla.
Og nú er vetrardagskráin komin í gang: fjórar æfingar í viku og þriðjudagstíminn í Breiðholtsskóla glænýr í vetur. Allir velkomnir, engin skráning og ekkert gjald. Mættu bara og prófaðu.
Fjórar æfingar í viku
Silfur á EASI Cup 2026 í Þýskalandi!
FC Sækó lék til úrslita í fyrsta sinn í sögu félagsins á alþjóðlega mótinu EASI Cup 2026 í Bad Tölz í Þýskalandi, þar sem fjórtán lið frá átta löndum tóku þátt. Liðið kom heim með silfur eftir naumt tap gegn heimamönnum í úrslitaleiknum, 0-1.
Góð heimsókn frá tökuliði RÚV
Vorið 2025 fengum við dásamlega heimsókn á æfingu frá tökuliði þáttarins „Með okkar augum“ á RÚV. Í þættinum ræddi Bergþór Grétar Böðvarsson við tökufólk um þann mikla sigur sem felst í því einu að draga sig á fætur og mæta á fótboltavöllinn.
YouTube
Spila myndbandið
Vetraræfingarnar eru hafnar, fjórar æfingar í viku!
Þú þarft ekki að skrá þig fyrirfram. Mættu bara og prófaðu, á þínum eigin forsendum og með bros á vör!
Kl. 13:50, Íþróttahús ÍFR, Hátún 14
Róleg æfing, hentar vel þeim sem eru að byrja
Futsal og innanhússspil á parketi. Ef fáir mæta byrjum við á göngufótbolta. Búningsaðstaða á staðnum.
Kl. 21:00, Breiðholtsskóli
Nýr tími frá 1. september
Innanhússæfing á parketi í íþróttasal skólans, klukkustund í senn. Búningsaðstaða á staðnum.
Kl. 12:30, Fífan, Kópavogi
Yfirleitt færri sem mæta, rólegt og afslappað
Gervigras inni. Skotæfingar, hreyfing og stundum létt styrktaræfing.
Kl. 18:00, Kórinn, Kópavogi
Fjölmennasta æfingin, yfirleitt 10+ sem mæta
Gervigras inni í Kórnum á fjórðungi vallar. Mikið tempó og fjör.
Tilkynningar
- Engar tilkynningar eins og er.
⚡️ FC Sækó Samfélagið
Aleksander Čeferin forseti UEFA og Bergþór Grétar.
Gullverðlaun UEFA 2018
Árið 2018 hlaut FC Sækó stærstu og eftirsóttustu grasrótarverðlaun UEFA (Grassroots Award) fyrir framúrskarandi starf. Verðlaunin voru veitt fyrir einstaka samfélagslega nálgun okkar þar sem fótbolti er notaður sem öflugt verkfæri til valdeflingar, andlegrar batavinnu og félagslegs jafnréttis.
Þessi viðurkenning staðfesti að starfið okkar á erindi á alþjóðavísu og gaf okkur byr undir báða vængi til að halda áfram að stækka.
Um FC Sækó
Titlar, greiningar og bakgrunnur verða eftir á hliðarlínunni, á vellinum erum við öll jöfn.
Geðveikur Fótbolti
FC Sækó er sjálfstætt knattspyrnufélag sem leggur áherslu á svokallaðan „geðveikan fótbolta“. Við nýtum kraft fótboltans til að efla andlega og líkamlega heilsu og draga úr fordómum.
Markmið okkar er að skapa stuðningsríkt og skemmtilegt umhverfi þar sem allir geta notið íþróttarinnar. Á æfingum og í leikjum eru allir jafnir, titlar og greiningar verða eftir utan vallar.
FC Sækó leikhópurinn á Falkirk-leikvanginum í Skotlandi.
Geðveikur fótbolti með FC Sækó og KSÍ
Á árunum 2021 til 2022 stóð FC Sækó í öflugu samstarfi við KSÍ undir heitinu „Geðveikur fótbolti með FC Sækó“. Verkefnið var sérstakt vitundarátak til að vekja athygli á því hvernig fótbolti og skipulagðar íþróttir geta haft jákvæð áhrif á líðan einstaklinga með geðraskanir.
Hlutverk KSÍ var að styðja við bakið á starfseminni og hvetja fyrirtæki og einstaklinga til að leggja málefninu lið, því margt smátt gerir eitt stórt.
Sagan okkar og stofnun félagsins
Verkefnið hófst upphaflega í nóvember 2011 sem samstarfsverkefni Hlutverkaseturs, Velferðarsviðs Reykjavíkur og geðsviðs Landspítalans. Markmiðið var frá upphafi að skapa vettvang þar sem fólk gæti rofið einangrun sína og hreyft sig á eigin hraða.
Árið 2014 var knattspyrnufélagið FC Sækó svo formlega stofnað. Félagið er í dag skipað notendum geð- og velferðarkerfisins, starfsmönnum þess og öllum öðrum sem vilja sýna stuðning í verki.
- ✓ Frítt að mæta og prófa
- ✓ Engar kröfur um kunnáttu
- ✓ Jafnrétti allra á vellinum
- ✓ Öflugt félagsstarf og erlendar ferðir
Ferðir & önnur verkefni
Sjálfstraust og vöxtur næst oftast þegar við stígum út fyrir þægindarammann okkar.
Ferðir eru mikilvægur hluti af starfi FC Sækó. Markmið okkar er að fara erlendis að jafnaði annað hvert ár til að heimsækja sambærileg verkefni erlendis, spila vináttuleiki og efla tengsl á milli iðkenda.
Ferðirnar styrkja líka heilsu og sjálfstraust þátttakenda, enda getur það verið stórt skref fyrir marga sem glíma við andleg veikindi að fara út fyrir þægindarammann. Langtímamarkmið félagsins er að halda alþjóðlegt mót í geðveikum fótbolta á Íslandi.
Tímalína ferða og árangurs
Smelltu á hverja ferð til að sjá nánari upplýsingar og sögur.
EASI Cup 2026 í Bad Tölz, Þýskalandi 🇩🇪
Silfurverðlaun og úrslitaleikur í fyrsta sinn í sögu félagsins! Fjórtán lið frá átta löndum kepptu í mikilli hitabylgju. FC Sækó vann níu af þrettán leikjum í deildarkeppninni en tapaði úrslitaleiknum naumlega, 0-1, gegn heimamönnum í Bad Tölz.
EASICUP 2025 í Steyr, Austurríki
FC Sækó tók þátt í 21. E.A.S.I. Cup í Steyr í Austurríki, einu stærsta mótinu í Evrópu þar sem fótbolti er nýttur til batavinnu, félagslegrar þátttöku og bættrar sjálfsmyndar.
Dream Euro Cup 2024 í Róm, Ítalíu 🇮🇹
Evrópumótið í futsal fyrir lið skipuð leikmönnum með geðrænar áskoranir. 12 keppnisþjóðir, glæsilegur sögulegur leikvangur og mikil samheldni og skemmtun.
Skotlandsferð 2024
Öflug endurkoma eftir Covid-hlé. Vináttuleikir við lið á vegum Celtic og Falkirk FC, heimsókn á heimavelli þeirra og öflugt hópefli í skoska hálöndunum.
Bergenferðin 2018, Noregi 🇳🇴
25 leikmenn heimsóttu Bergen. Æfingar, leikir gegn sambærilegum norskum verkefnum og mikil gleði sem þjappaði hópnum enn betur saman á sama ári og við unnum UEFA verðlaunin.
Nottingham 2016, Englandi 🏴
Keppnis- og kynnisferð þar sem heimsótt var Notts County FC ásamt því að byggja upp dýrmæt tengsl við bresk grasrótarlið.
Skotlandsförin 2014, fyrsta stóra ferðin
Leikir í Glasgow og á aðalleikvangi Falkirk FC. Þarna myndaðist einstök liðsheild og hin sanna hugmynd og sál á bak við FC Sækó varð formlega til.
Viltu vera með?
Við tökum alltaf vel á móti nýju fólki og þú ert velkomin(n) í hópinn okkar!
Ertu að hugsa um að mæta í fyrsta skipti?
Það er alveg eðlilegt að vera óviss eða vita ekki alveg við hverju má búast. Við leggjum ríka áherslu á að allir finni til öryggis og séu velkomnir strax frá fyrstu mínútu.
Þú þarft enga reynslu af fótbolta, þarft ekki að vera í góðu formi og þarft ekki að skrá þig fyrirfram. Mættu bara!
Við spilum á okkar forsendum. Hreyfing, samvera og skemmtun eru markmiðin.
Við hverju má búast á æfingu?
Hvernig æfingin fer fram fer eftir mætingu. Stundum byrjum við á léttri og skemmtilegri upphitun, stundum spilum við göngufótbolta þar sem hlaup eru bönnuð og stundum förum við beint í hefðbundið spil.
Allir stjórna sínu álagi sjálfir og það má hvenær sem er stíga af velli til að fá sér vatnssopa eða spjalla á hliðarlínunni.
Viltu spyrja einhvers áður en þú mætir?
Bergþór svarar alltaf öllum spurningum, hvort sem er í síma eða tölvupósti.
Lög FC Sækó
Gagnsæi, jafnrétti og skipulag Knattspyrnufélagsins FC Sækó
1. grein
Félagið heitir FC Sækó, félagasamtök. Lögheimili þess og varnarþing er að Engjateigi 3, Reykjavík.
2. grein
Tilgangur félagsins er að nota fótbolta sem vettvang til að efla andlega og líkamlega heilsu, auka virkni, rjúfa félagslega einangrun og draga úr fordómum gagnvart aðilum sem glíma við andlegar áskoranir. Félagið starfar í þágu almannaheilla og stundar ekki atvinnurekstur. Félagsmenn njóta ekki fjárhagslegs ávinnings af starfsemi þess.
3. grein
Tilgangi sínum hyggst félagið ná með því að halda úti reglulegum knattspyrnuæfingum, skapa öruggan og fordómalausan vettvang fyrir félagsskap og hreyfingu, og taka þátt í mótum og ferðalögum.
4. grein
Félagið er opið öllum sem vilja taka þátt í og styðja við tilgang félagsins. Öllum skal sýnd virðing og aðgát óháð getu eða bakgrunni.
5. grein
Starfstímabil félagsins er almanaksárið. Á aðalfundi skal stjórn gera upp árangur liðins árs. Aðeins félagsmenn mega vera þátttakendur á aðalfundi.
6. grein
Aðalfundur fer með æðsta vald í málefnum félagsins. Aðalfund skal halda ár hvert, eigi síðar en 31. maí. Til aðalfundar og annarra almennra félagsfunda skal boðað með að minnsta kosti tveggja vikna fyrirvara með sannanlegum hætti. Aðalfundur er löglegur sé rétt til hans boðað. Aðeins félagsmenn hafa atkvæðisrétt á aðalfundi. Einfaldur meirihluti mætra félagsmanna ræður úrslitum mála.
Dagskrá aðalfundar skal vera sem hér segir:
- Kosning fundarstjóra og fundarritara.
- Skýrsla stjórnar lögð fram.
- Reikningar lagðir fram til samþykktar.
- Lagabreytingar.
- Ákvörðun um árgjöld og/eða æfingagjöld.
- Kosning stjórnar.
- Kosning skoðunarmanns eða endurskoðanda reikninga.
- Önnur mál.
7. grein
Stjórn félagsins skal skipuð 5-10 félagsmönnum, formanni og 4-9 meðstjórnendum, kjörnum á aðalfundi til tveggja ára í senn. Einnig er heimilt að kjósa allt að 3 varamenn. Stjórnin skiptir með sér verkum (varaformaður, gjaldkeri, ritari o.s.frv.) á fyrsta stjórnarfundi eftir aðalfund. Stjórn félagsins fer með málefni félagsins milli aðalfunda. Formaður boðar til funda. Firmaritun er í höndum meirihluta stjórnar.
8. grein
Ákvörðun um árgjöld og/eða æfingagjöld skal tekin á aðalfundi. Ef ekki eru innheimt árgjöld er starfsemi félagsins fjármögnuð með frjálsum framlögum, styrkjum, söfnunarfé og æfingagjöldum.
9. grein
Rekstrarafgangi eða hagnaði af starfsemi félagsins skal eingöngu varið í samræmi við tilgang félagsins. Félagsmenn njóta ekki fjárhagslegs ávinnings af starfsemi þess.
10. grein
Ákvörðun um slit félagsins verður aðeins tekin á löglegum aðalfundi eða auka-aðalfundi. Við möguleg slit á félaginu skulu eignir þess renna til annars góðgerðarfélags eða málefnis sem samræmist tilgangi FC Sækó um bætta geðheilsu. Eignir mega aldrei renna til félagsmanna sjálfra.