Þar sem geðheilsa, hreyfing og gleði fara saman. Við nýtum kraft fótboltans til að efla andlega og líkamlega heilsu og draga úr fordómum.
Þú þarft ekki að skrá þig fyrirfram. Mættu bara og prófaðu, á þínum eigin forsendum og með bros á vör!
Oft futsal/innanhúss spil. Ef 4–6 mæta byrjum við á göngufótbolta.
Æfingar á gervigrasinu. Sumaræfingar hófust formlega 3. júní.
Gervigras í Garðabæ. Frábær aðstaða og mikið fjör á útisvæðinu.
Aleksander Čeferin forseti UEFA og Bergþór Grétar.
Árið 2018 hlaut FC Sækó stærstu og eftirsóttustu grasrótarverðlaun UEFA (Grassroots Award) fyrir framúrskarandi starf. Verðlaunin voru veitt fyrir einstaka samfélagslega nálgun okkar þar sem fótbolti er notaður sem öflugt tól til valdeflingar, andlegrar batavinnu og félagslegs jafnréttis.
Þessi viðurkenning staðfesti að starfið okkar á erindi á alþjóðavísu og gaf okkur byr undir báða vængi til að halda áfram að stækka.
Vorið 2025 fengum við dásamlega heimsókn á æfingu frá tökuliði þáttarins „Með okkar augum“ á RÚV. Í þættinum ræddi Bergþór Grétar Böðvarsson við tökufólk um þann mikla sigur sem felst í því einu að draga sig á fætur og mæta á fótboltavöllinn.
YouTube
Spila myndbandið
Júní verður stór mánuður hjá FC Sækó — tveir stórviðburðir á innan við viku.
Reykjavík — fótbolti, félagsskapur og alþjóðleg stemning yfir björtustu daga ársins.
Bad Tölz í Þýskalandi — 10 manna hópur. Áhersla á fótbolta, geðheilsu og félagslega inngildingu — gildi sem passa fullkomlega við anda FC Sækó.
Við hlökkum til að mæta á völlinn, hitta nýtt fólk og sýna hvað geðveikur fótbolti stendur fyrir.
Titlar, greiningar og bakgrunnur verða eftir úti á hliðarlínu – á vellinum erum við öll jöfn.
FC Sækó er sjálfstætt knattspyrnufélag sem leggur áherslu á svokallaðan „geðveikan fótbolta“. Við nýtum kraft fótboltans til að efla andlega og líkamlega heilsu og draga úr fordómum.
Markmið okkar er að skapa stuðningsríkt og skemmtilegt umhverfi þar sem allir geta notið íþróttarinnar. Á æfingum og í leikjum eru allir jafnir - titlar og greiningar verða eftir utan vallar.
FC Sækó leikhópurinn á Falkirk-leikvanginum í Skotlandi.
Á árunum 2021 til 2022 stóð FC Sækó í öflugu samstarfi við KSÍ undir heitinu „Geðveikur fótbolti með FC Sækó“. Verkefnið var sérstakt vitundarátak til að vekja athygli á því hvernig fótbolti og skipulagðar íþróttir geta haft jákvæð áhrif á líðan einstaklinga með geðraskanir.
Hlutverk KSÍ var að styðja við bakið á starfseminni og hvetja fyrirtæki og einstaklinga til að leggja málefninu lið, því margt smátt gerir eitt stórt.
Verkefnið hófst upphaflega í nóvember 2011 sem samstarfsverkefni Hlutverkaseturs, Velferðarsviðs Reykjavíkur og geðsviðs Landspítalans. Markmiðið var frá upphafi að skapa vettvang þar sem fólk gæti rofið einangrun sína og hreyft sig á eigin hraða.
Árið 2014 var knattspyrnufélagið FC Sækó svo formlega stofnað. Félagið er í dag skipað notendum geð- og velferðarkerfisins, starfsmönnum þess og öllum öðrum sem vilja sýna stuðning í verki.
Sjálfstraust og vöxtur næst oftast þegar við stígum út fyrir þægindarammann okkar.
Ferðir eru mikilvægur hluti af starfi FC Sækó. Markmið okkar er að fara erlendis að jafnaði annað hvert ár til að heimsækja sambærileg verkefni erlendis, spila vináttuleiki og efla tengsl á milli iðkenda.
Ferðirnar styrkja líka heilsu og sjálfstraust þátttakenda - fyrir marga sem glíma við andleg veikindi getur það verið stórt skref að fara út fyrir þægindarammann. Langtímamarkmið félagsins er að halda alþjóðlegt mót í geðveikum fótbolta á Íslandi.
Smelltu á hverja ferð til að sjá nánari upplýsingar og sögur.
FC Sækó tók þátt í 21. E.A.S.I. Cup í Steyr í Austurríki, einu stærsta mótinu í Evrópu þar sem fótbolti er notaður sem tól til batavinnu, félagslegrar þátttöku og bættrar sjálfsmyndar.
Evrópumótið í futsal fyrir lið skipuð leikmönnum með geðrænar áskoranir. 12 keppnisþjóðir, glæsilegur sögulegur leikvangur og mikil samheldni og skemmtun.
Öflug endurkoma eftir Covid hlé. Vináttuleikir við lið á vegum Celtic og Falkirk FC, heimsókn á heimavelli þeirra og öflugt hópefli í skoska hálöndunum.
25 leikmenn heimsóttu Bergen. Æfingar, leikir gegn sambærilegum norskum verkefnum og mikil gleði sem þjappaði hópnum enn betur saman á sama ári og við unnum UEFA verðlaunin.
Keppnis- og kynnisferð þar sem heimsótt var Notts County FC ásamt því að byggja upp dýrmæt tengsl við bresk grasrótarlið.
Leikir í Glasgow og á aðalleikvangi Falkirk FC. Þarna myndaðist einstök liðsheild og hin sanna hugmynd og sál á bak við FC Sækó varð formlega til.
Við tökum alltaf vel á móti nýju fólki – þú ert velkomin(n) í hópinn okkar!
Það er alveg eðlilegt að vera óviss eða vita ekki alveg við hverju má búast. Við leggjum ríka áherslu á að allir finni til öryggis og séu velkomnir strax frá fyrstu mínútu.
Þú þarft enga reynslu af fótbolta, þarft ekki að vera í góðu formi og þarft ekki að skrá þig fyrirfram. Mættu bara!
Við spilum á okkar forsendum. Hreyfing, samvera og skemmtun eru markmiðin.
Hvernig æfingin fer fram fer eftir mætingu. Stundum byrjum við á léttri og skemmtilegri upphitun, stundum spilum við göngufótbolta þar sem hlaup eru bönnuð og stundum förum við beint í hefðbundið spil.
Allir stjórna sínu álagi sjálfir og það má hvenær sem er stíga af velli til að fá sér vatnssopa eða spjalla á hliðarlínunni.
Bergþór svarar alltaf öllum spurningum, hvort sem er í síma eða tölvupósti.
Gagnsæi, jafnrétti og skipulag Knattspyrnufélagsins FC Sækó
Félagið heitir FC Sækó, félagasamtök. Lögheimili þess og varnarþing er að Engjateigi 3, Reykjavík.
Tilgangur félagsins er að nota fótbolta sem vettvang til að efla andlega og líkamlega heilsu, auka virkni, rjúfa félagslega einangrun og draga úr fordómum gagnvart aðilum sem glíma við andlegar áskoranir. Félagið starfar í þágu almannaheilla og stundar ekki atvinnurekstur. Félagsmenn njóta ekki fjárhagslegs ávinnings af starfsemi þess.
Tilgangi sínum hyggst félagið ná með því að halda úti reglulegum knattspyrnuæfingum, skapa öruggan og fordómalausan vettvang fyrir félagsskap og hreyfingu, og taka þátt í mótum og ferðalögum.
Félagið er opið öllum sem vilja taka þátt í og styðja við tilgang félagsins. Öllum skal sýnd virðing og aðgát óháð getu eða bakgrunni.
Starfstímabil félagsins er almanaksárið. Á aðalfundi skal stjórn gera upp árangur liðins árs. Aðeins félagsmenn mega vera þátttakendur á aðalfundi.
Aðalfundur fer með æðsta vald í málefnum félagsins. Aðalfund skal halda ár hvert, eigi síðar en 31. maí. Til aðalfundar og annarra almennra félagsfunda skal boðað með að minnsta kosti tveggja vikna fyrirvara með sannanlegum hætti. Aðalfundur er löglegur sé rétt til hans boðað. Aðeins félagsmenn hafa atkvæðisrétt á aðalfundi. Einfaldur meirihluti mætra félagsmanna ræður úrslitum mála.
Dagskrá aðalfundar skal vera sem hér segir:
Stjórn félagsins skal skipuð 5-10 félagsmönnum, formanni og 4-9 meðstjórnendum, kjörnum á aðalfundi til tveggja ára í senn. Einnig er heimilt að kjósa allt að 3 varamenn. Stjórnin skiptir með sér verkum (varaformaður, gjaldkeri, ritari o.s.frv.) á fyrsta stjórnarfundi eftir aðalfund. Stjórn félagsins fer með málefni félagsins milli aðalfunda. Formaður boðar til funda. Firmaritun er í höndum meirihluta stjórnar.
Ákvörðun um árgjöld og/eða æfingagjöld skal tekin á aðalfundi. Ef ekki eru innheimt árgjöld er starfsemi félagsins fjármögnuð með frjálsum framlögum, styrkjum, söfnunarfé og æfingagjöldum.
Rekstrarafgangi eða hagnaði af starfsemi félagsins skal eingöngu varið í samræmi við tilgang félagsins. Félagsmenn njóta ekki fjárhagslegs ávinnings af starfsemi þess.
Ákvörðun um slit félagsins verður aðeins tekin á löglegum aðalfundi eða auka-aðalfundi. Við möguleg slit á félaginu skulu eignir þess renna til annars góðgerðarfélags eða málefnis sem samræmist tilgangi FC Sækó um bætta geðheilsu. Eignir mega aldrei renna til félagsmanna sjálfra.
Öll framlög fara beint í að niðurgreiða leigu á æfingaaðstöðu (Hátún, Fífan, o.fl.), kaupa sameiginlegan íþróttabúnað og gera liðsmönnum kleift að ferðast á erlend mót án mikils persónulegs kostnaðar.